fimmtudagur, 22. janúar 2009

Uppþvotta-Bjarni, Obama, óeirðir og Stöð 2

Einmitt þegar maður hélt að botninum væri náð hjá Ara Edwald og Stöð 2, bárust þær fréttir að hann hefði rekið á einu bretti aðalfréttaþul stöðvarinnar, aðalpródúsentinn, lagt niður helsta verðlaunaprógrammið og rekið alla starfsmenn þess.

Í stað Íslands í dag eru komnir annars vegar þættir til varnar auðmönnum og hins vegar helgimynd af stjórnmálamanni.

Þegar Barack Obama, varð forseti Bandaríkjanna, fyrstur hörundsdökkra manna; Bush-martröðnni lauk; mestu óeirðir í 50 ár urðu á Íslandi og ríkisstjórnin rambaði á barmi falls töldu stjórnendur Stöðvar 2 ástæðu til að hafa á dagskrá þátt sem auglýstur var á visi.is með þeim hætti að þar upplýsti eiginkona Bjarna Ben, þingmanns um frammistöðu hans með uppþvottabursta. Af hverju ekki bara að fara alla leið og fjalla um frammistöðu hans í rúminu? Það er hvort sem er ekki hægt að niðurlægja manninn meira en þetta!

Það eru aðeins “snillingar” sem geta látið sér detta þetta í hug. Að uppþvottaburstinn sé líklegri til að fanga athygli áhorfenda en byltingarástand á Íslandi og Barack Obama er einfaldlega frábært.

Rétt eins og að bjóða áhorfendum upp á það að í stað Íslands í dag eigi þeir að trúa og treysta annars vegar Sindra Sindrasyni fyrrverandi blýantayddara og töskubera eigandans og hins vegar Birni Inga Hrafnssyni sem þekktur varð fyrir að gera besta bissnesdíl Íslands að mati eiganda Stöðvar 2 egar hann reyndi að afhenda þeim góða manni og félögum hans helstu auðlindir Reykjavíkurborgar. Á skid og ingenting.

Aðeins snillingar telja það sjónvarpsstöð sinni til framdráttar að reka á einu bretti aðalfrétttaþulinn Sigmund Erni Rúnarsson sem er einn vinsælasti sjónvarpsmaður landsins (þótt hann pirri mig stundum eins og eyjarskeggjar punktur is vita...), Elinu Sveinsdóttur, aðalpródúsent og verðlaunafréttamennina Kristinn Hrafnsson og Jóhannes Kristjánsson.

Það er að vísu rétt að ég treysti Kompásmönnunum fremur illa til þáttagerðar um ágæti auðmanna og uppvask stjórnmálamanna. Og Sigmundi og Elínu dytti ekki í hug að að láta slíkar lofrullur koma í staðinn fyrir úttekt á helstu málum líðandi stundar.

Ekki trúi ég öðru en að Bjarni Benediktsson og eiginkona hans hafi skammast sín niður fyrir tær þegar þessi vitleysa var sýnd. Það er ekki þeim að kenna að það er hætt við að hér eftir verði aumingja Bjarni kenndur við þann hlut sem hann hatast mest við: Uppþvotta-Bjarni.

Hvað ætlar Jón Ásgeir að láta þessa dellu halda lengi áfram? Ari Edwald réttlæti brottekstur Sigmundar með því að Ernirinn væri þungur á fóðrum.

Ef Jón Ásgeir kíkir í bókhaldið sér hann að hann getur fengið þau öll Simma, Elínu, Kristinn og Jóhannes fyrir einn Ara Edwald. Og það sem meira er hann fengi í kaupbæti að hætt yrði að hlæja að Stöð 2 út um allan bæ

14 ummæli:

Nafnlaus sagði...

Held að Bjarni hafi sloppið vel frá þessu. Það var enginn að horfa á þessa vitleysu. Allir í byltingarástandinu og Obama.

Nafnlaus sagði...

Er ekki eitthvað hvítt í duftformi að rugla dómgreind þeirra?

Þráinn sagði...

Eftir höfðinu dansa limirnir. Það góða fólk sem nú hefur verið rekið af Stöð 2 mun finna til mikils léttis að þurfa ekki lengur að sprikla samkvæmt höfði Ara Edvalds. Þeim létti fann ég fyrir þegar ég var rekinn af Fréttablaðinu.

Nafnlaus sagði...

Gleymdu ekki Heimi Má fyrrverandi framkvæmdastjóra Samfylkingarinnar sem flytur fréttir af málefnum þess flokks.

Hvað yrði sagt ef mágur þinn Kjartan Gunnarsson gerðist fréttamaður á mbl.is sjónvarpinu og segði okkur fréttir af landsfundi Sjálfstæðisflokksins?

Nafnlaus sagði...

Ég er með Fréttablaðið í töskunni dögum saman en ekki gefið mér tíma til að fletta því. Sakna þess ekki. Þeir eru hættir að ná yfir það sem er að ske. Þetta er þvílíkt draslblað og svo er Þráinn hættur að skrifa í það.
Netmiðlar hafa tekið yfir með fréttaflutning.

Nafnlaus sagði...

Djöfull smellhittir þú naglann í hausinn þarna Árni Snævarr..

Nafnlaus sagði...

heyr heyr !!!!

Algerlega sammála þér Árni, frábærlega orðað!

kv
Ragga

Nafnlaus sagði...

Þessi tiltekni Kompásþáttur sló ekki í gegn á toppnum:
Kompás - útrásin

Arinbjörn Kúld sagði...

Stöð2 er hlægileg. Búin að skíta upp á herðar. Flottur pistill hjá þér Árni.

Nafnlaus sagði...

Hann er að verða langur listinn yfir góða menn sem Stöð 2 hefur losað sig við síðustu mánuði. Þórir Guðmundsson, Steingrímur Ólafsson, Ómar Valdimarsson, Sölva Tryggvason, Inga Lind Karlsdóttir, Sigmundur Ernir, Elín Sveinsdóttir, Heimir Már Pétursson og líklega er listinn lengri. Allt fólk með áratugareynslu af fréttaflutningi, fólk sem maður treysti. Í staðinn höfum við fengið Óskar Hrafn Þorvaldsson, Freyr Einarsson, Sindra Sindrason og Sigrúnu Ósk. Ætli þetta teljist góð skipti.

Nafnlaus sagði...

Ég má til með að leggja orð í belg!

Það veit sá sem allt veit að ég sakna minna ágætu félaga Sigmundar Ernis og Þráins úr Skaftahlíðinni. Og ég ætla ekki að hafa á því opinbera skoðun til eða frá hvað varðar þessar ráðstafanir yfirstjórnar fyrirtækisins. En vil þó benda á að þessi mál eru ekki eins einföld og menn vilja vera láta - bæði viðkvæm og þungbær án þess að ég sé að reyna að afsaka eitt né neitt enda ekki mitt.

Mér finnst langsótt hjá Árna að sækja samsæriskenningar og styðja þær einhverju því sem teljast má galið fréttamat í einum þætti Íslands í dag. En það langaði mig ekki að ræða heldur ... Guð minn almáttugur hvað þeim Þráni og Simma tekst að gera lítið úr sjálfum sér með þessum óskiljanlegu vindhöggum sem hitta fyrir vini þeirra á gólfinu og leggja vopnin í hendur hatursfullum smjörklípumönnum á borð við Bíbí. Simma er létt að vera laus undir oki auðmanna! Og Þráinn finnur til mikils léttis að þurfa ekki lengur að dansa eftir höfði Ara Edwalds. Jahá! Þeir mega þá heita litlir karlar að hafa árum saman - áratugum - þegið rífleg laun hjá fyrirtækinu en koma nú fram með þessi tíðindi en fyrst þá þegar þeir urðu fyrir niðurskurðarhníf. Lítið lagðist fyrir kappana, hina miklu samfélagsrýna. (Ef þetta ber fyrir þín augu, Þráinn... ætlar þú virkilega að halda því fram að hafa einhvern tíma sætt ritskoðaðun af hálfu Ara Edwald eða ritstjóra Fréttablaðsins ef því er að skipta? Hvurskonar tjöru eruð þið herramenn að bjóða uppá hérna?)

Mér finnst þetta bókstaflega dapurlegt innlegg í umræðuna og það hlýtur að skrifast á geðshræringu þeirra. Því þetta heldur engu vatni. Verða menn ekki að halda haus? Að þessum ummælum undanteknum, hálfkveðnum vísum og náttúrlega ógrynni hártogana Páls Vilhjálmssonar, Bíbís og co finnst enginn vitnisburður fyrrum starfsmanna 365 um ritskoðun. Og er þó þar um nokkurn fjölda að ræða.

Kveðja,
Jakob

Nafnlaus sagði...

Ps. Ef til vill á þetta sítat í Þráinn frá í sumar, athugasemd sem hann setti inn á vef Guðmundar Gunnarssonar, vel við. Hvað breyttist Þráinn frá því þú skrifaðir þetta?

"24. júní 2008 11:27
þráinn Bertelsson sagði...
Ég tek undir með kollega mínum Bergsteini og trúi því ekki að á ritstjórnum blaða liggi lengur greinar sem ekki fáist birtar út af pólitísku innihaldi.
Ég hef skrifað að staðaldri í Fréttablaðið frá fyrsta útkomudegi þess og eina umsögnin sem ég hef fengið um hinn pólitíska þátt í mínum skrifum er þessi frá öðrum ritstjóra Fréttablaðsins: "Mér þætti ekki verra þótt pólitíkin væri ennþá meira áberandi í þínum skrifum!" Svo að á þeim bæ, Fréttablaðinu er ritfrelsið í lagi. Blogg og veraldarvefur hafa enda gert það óframkvæmanlegt að bæla niður pólitískar hugmyndir amk. hérna á vesturlöndum."

Kveðja,
Jakob

Nafnlaus sagði...

Rétt Árni.
Ótrúlegt að fylgjast með fjölmiðlum þessa dagana. Fréttir Stöðvar 2 í gærkvöldi þ.e. á fimmtudagskvöld slógu öll met. Tvær ungar fréttakonur sem varla eru mælandi á íslenska tungu sögðu frá því hvað mótmælin væru æðisleg og töluðu auðvitað við Hallgrím Helagson og varaformann vinstri grænna sem auðvitað tók þátt í mótmælum fólksins, alþýðunnar sem henni er svo annt um.
Ekki var ríkissjónavrpið skárra sama kvöld. Þar talaði Þóra Arnórsdóttir við tvo stjórnmálafræðinga og krafðist þess að þeir segðu hvaða ráðherrar væru á útleið og hvaða menn myndu koma nýir inn í stjórnina! Hvaða stjórn? Jú sennilega stjórn samfylkingar og vg sem Þóra var búin að mynda. Hún hafði engan áhuga á mögulegum málefnum og ágreiningi þessarar stjórnar.
Stjórnmálafræðingarnir voru eins og fífl og fóru jafn illa út úr þessu og fréttakonan.
Það er mikið áhyggjumál hversu hörmulega lélegir fjölmiðlar eru á þessum miklu örlagadögum. Baugsmiðlarnir eru greinilega enn í sömu herferðinni og Jón Ásgeir og töskuberar hans stjórna þeim nú enn frekar en áður.
En að ríkissjónvarpið skuli bjóða upp á svona þvætting er hreint hneyksli. Ekki vil ég þessu fólki nokkuð illt en mér þykir ömurlegt að við séum neydd til að borga laun þessa fólks. Amk hef ég flest allt annað að gera við peningana mína í kreppunni.

Þráinn sagði...

Jakob og Nafnlaus. Flestum ef ekki öllum vinnustöðum fyrir takmarkað frelsi. Sú takmörkun þarf ekki að felast í því að manni sé uppálagt að gera eitthvað sem er manni á móti skapi. Sú takmörkun getur stafað að því að maður tengist fyrirtæki sem gerir ýmsa hluti sem eru manni ekki að skapi - þótt ekki sé þrengt að persónulegu frelsi manns í starfi.
Þetta er kannski ekki sérlega einfalt og alla vega flóknara en svo að ímynda sér að allir blaðamenn séu undir stöðugri ritskoðun hver í sínu lagi. Það getur verið ritstjórnar- eða rekstrarstefnan sem er þrúgandi.